Mbrëmjen e sotme, “djajtë e kuq” të Manchester United do të presin në “Old Trafford”, Barcelonën, në ndeshjen e kthimit të fazës së 1/16-ve, të UEFA Europa League, me përballjen e parë mes dy “gjigandëve”, që u mbyll me barazimin spektakolar 2 me 2.
Për atmosferën dhe shancet që ka United për të kaluar fazën foli dhe anësori i djathtë i mbrojtjes së “djajve”, Diogo Dalot, i cili duket tepër entuziast për përballjen me Barcelonën.
“Në ndeshjet e fundit ne kemi treguar se jemi një ekip, shumë lojtarë vijnë nga pankina dhe bëjnë diferencën.Në të ardhmen duam të tregojmë se bëjmë mirë, se të gjithë kanë rëndësi dhe të gjithë mund të thonë fjalën në këtë ekip. Kjo do të na përmirësojë.
Kundër Barcelonës do të jetë një ndeshje cilësore, emocionuese dhe mendoj se tifozët do ta vlerësojnë atë. Ne do të përpiqemi të argëtohemi dhe të shpresojmë të festojmë. Nëse duam të luajmë ndeshjet më të mira evropiane, nëse duam të fitojmë trofe dhe të jemi në lartësinë e tij, ne duhet të tregojmë se mund t’i fitojmë këto ndeshje”,- është shprehur Dalot. /i.m /abcnews.al
