Antonio Conte doli me kokën lart nga derbi i Milanos. Pas ndeshjes ai foli për DAZN dhe përgëzoi lojtarët e tij. “Është derbi dhe ndeshje të tilla janë gjithmonë speciale. Nuk është kurrë e lehtë të fitosh. Djemtë kanë bërë një lojë të mirë dhe fitoja normalisht na jep një kënaqësi të madhe”, shprehet fillimisht Conte.
Italiani tregon se barazimi me Slavia Prague i zgjoi dhe kjo i ndihmoi në fitimin e derbit me Milanin. “Vinim nga një ndeshje që na kishte lënë shije të hidhur, por na dha karikimin e duhur për të përballuar derbin. Jam i lumtur për lojtarët dhe tifozët tanë. Ishte derbi i parë dhe doja të bënim një figurë të mirë”, shtoi tekniku i Interit.
LUKAKU – Conte foli edhe për Lukakun, i cili shënoi golin e dytë ndaj Milanit: “Lukaku është një 26-vjeçar që erdhi këtu falë potencialit që ai ka. Bëhet fjalë për një lojtar shumë të rëndësishëm për ne, sikurse edhe Lautaro që është 22 vjeç.
Përmes punës duhet të përmirësoj lojtarët e mi. E rëndësishme është që ata janë të gatshëm të punojnë. Nuk jam i kënaqur për nisjen në Champions, por na ka bërë të kuptojmë shumë gjëra dhe na rikthye në rrugën e duhur”.
PËRPLASJA NË DHOMAT E ZHVESHJES – Pas ndeshjes me Slavia Prague ka pasur një debat mes Lukakut dhe Brozovic, gjë që konsiderohet normale nga Conte. Ai thekson se të dy lojtarët e tij janë shembullorë dhe ndonjëherë kjo nuk i pëlqen shumë atij.
“Nuk mund të kesh probleme me djem si ata, janë të dy të shkëlqyeshëm. Shpesh herë zemërohem me ta sepse janë shumë të mirë. Ky është një grup i shëndetshëm, që ka shumë dëshirë dhe i pëlqen të jetë i bashkuar. Kur përplasesh me një shok a do të thotë që në vena të rrjedh gjak? Më pas në mbrëmje darkon me të dhe jeni miq si më parë. Kemi punuar shumë këto dy muaj dhe normalisht që ka pasur vështirësi. Kanë ikur lojtarë dhe kanë ardhur të tjerë. Kjo më ka penalizuar pak”, përfundon Conte. /abcnews.al
