Bayerni i Mynihut dhe Juventusi kërkojnë të ruajnë vendin e parë në grup në Ligën e Kampionëve. Dy skuadrat e mëdha luajnë sot ndeshjet e fundit, dhe gjermanët kanë një sfidë klasike ndaj Ajax-it.
Vetëm njëra prej tyre do të jetë klasike, por vëmendja ëshë tek të dyja. Bajerni dhe Juventusi zbresin sot në fushë në Ligën e Kampionëve, në orën 21:00, me objektiv të njëjtë, të sigurojnë vendin e parë në grup. Gjermanët udhëtuan për në Holandë, ku i pret një klasike europiane, ndeshja me Ajaksin në Amsterdam, dhe atyre u bën punë edhe një barazim.
Do të ketë mungesa, sërish. Arjen Roben është lënë jashtë ekipit, për të qenë gati për Bundesligën. Po ashtu, janë mungesat e James Rodrigezit dhe Korenten Toliso, por trajneri Niko Kovaç flet pa asnjë lëkundje.
“Duam të dalim në vend të parë në grup, – tha kroati, – dhe ta luajmë ndeshjen e dytë në turin tjetër, në shtëpi. Nuk kemi probleme, dhe nuk jam i shqetësuar nga deklaratat e Komanit, pasi janë normale në futboll. Ajaksi është një ekip shumë i mirë, dhe unë këtë e kam ditur që më përpara”.
Ajax-i gjithsesi, nuk pritet të jenë me potencial të plotë. Trajneri Ten Hag, sipas mediave holandeze, po mendon të lerë jashtë ekipi disa nga yjet si Dolbergun, Zijeçin dhe Van de Bekun, që janë në rrezik për t’u dëmtuar. Pesë herë kampionët e Europës duan të ruajnë forcat edhe për kampionatin, pasi konkurrimi për titull me PSV Eindhovenin është shumë i fortë.
Kjo mund t’ia lehtësojë detyrën bavarezëve, që të paktën do të kenë një sukses të rëndësishëm në një sezon të vështirë, ku ndodhen në vend të tretë në Bundesligë. Skuadra tjetër e madhe që kërkon të mbajë vendin e parë është Juventusi. Trajneri Masimiliano Allegri e ka përgatitur skuadrën që të shkojë në Zvicër vetëm për fitore ndaj Young Boys-it. Kampionët e Italisë kryesojnë grupin H me 12 pikë ndaj 10 të Mançester Junajtidit, dhe vetëm fitorja ia bën të sigurt kryesimin.
“Dua që të luajmë një tur të dytë më të qetë, – u shpreh Alegri, – për këtë na duhet vendi i parë, pra normalisht na duhet fitorja. Nëse do të ishte ndryshe, CR7-ta do të pushonte ndaj Young Boys-it. Nëse nuk dalim të parët, rrezikojmë të ndeshemi me rivalë shumë të fortë si Barcelona, Reali, Bayerni, City apo Paris SG”.
Pra, Cristiano Ronaldo do të jetë në fushë, por nuk do të luajë Giorgo Chielini. Fusha e Young Boys-it është me bar sintetik dhe Allegri ka frikë se kapiteni do të dëmtohet. United, ndërkaq, do të ketë një ndeshje të vështirë në Spanjë ndaj Valencias.
Anglezët janë të kualifikuar, por trajneri Jose Mourinho po kalon një moment të vështirë, ndaj kërkon që ekipi të luajë mirë dhe për fitore. Ai u shpreh se do t’i japë mundësi të shumëkritikuarit Paul Pogba që të luajë në formacion për të treguar veten./abcnews.al
