SHQIPËRI- Banka e Shqipërisë ka blerë 270 milionë euro në treg gjatë sezonit të verës si një masë për të mbajtur nën kontroll kursin e këmbimit.
Sipas të dhënave zyrtare rezulton se vetëm gjatë tremujorit të tretë të vitit që përkon me pikun e sezonit turistik çka sjell më shumë euro në qarkullim Banka Qendrore ka tërhequr 270.50 milionë euro, nga të cilat janë blerë 176.10 milionë euro për të ndalur zhvlerësimin e euros dhe 94.4 milionë euro me qëllim rritjen e rezervës valutore.
Por pavarësiht kësaj ndërhyrjeje në korrik-gusht-shtator monedha europiane vijoi dobësimin dhe preku vlerat më të ulëta, duke zbritur nën 100 lekë.
Sipas Bankës së Shqipërisë në 9 muaj Banka e Shqipërisë ka tërhequr 313 milionë euro, nga tregu valutor me qëllim stabilizimin e kursit euro-lek, por mesa duket efektet kanë qenë minimale pasi zhvlerësimi i euros preku rekorde të reja duke arritur në kufijtë e 98 lekëve.
Ndërkohë vitin e ardhshëm ndërhyrjet e Bankës së Shqipërisë parashikohen të jetë më të forta ndërsa ka planifikuar të blejë 350 milionë euro për rritjen e rezervës.
Në kalendarin e ndërhyrjeve për vitin e ardhshëm, banka ka planifikuar 22 ankande, me synim blerjen e 350 milionë euro për të rritur rezervën valutore, rreth 20 milionë euro më shumë se plani i këtij viti./ abcnews.al
