Presidenti i Këshillit Evropian Charles Michel tha këtë të premte se premtimi i Izraelit për të hapur përkohësisht pikat kufitare për ndihmë humanitare në Gaza ishte “i papërshtatshëm” duke pasur parasysh rrezikun e urisë për banorët.
“Fëmijët dhe foshnjat po vdesin nga uria. Duhen përpjekje thelbësore dhe urgjente për t’i dhënë fund urisë si një armë lufte në Gaza”, tha ai në postimin e tij në platformën X.
“Njoftimi i Izraelit për rihapjen e përkohshme të pikës kufitare Erez si dhe ai për transferimin e ndihmave humanitare përmes portit të Ashdod është i pamjaftueshëm”, nënvizoi Michel.
Komisioni Evropian i kërkoi palës tjetër që “të zbatojë shpejt dhe plotësisht” premtimet e Izraelit. Shefi i politikës së jashtme evropiane Josep Borrell theksoi gjithashtu se vendimi i Izraelit për të hapur disa korridore për ndihmën humanitare nuk do të mjaftojë për të parandaluar urinë.
“Pas dënimit të përhapur të vdekjes së 7 punëtorëve të WCK nga IDF (ushtria izraelite) dhe presionit ndërkombëtar në rritje, qeveria e Izraelit do të hapë disa korridore për ndihmë humanitare. Nuk mjafton për të parandaluar urinë në Gaza,” shkroi Borrell në postimin e tij në platformën X.
“Rezoluta detyruese 2728 e Këshillit të Sigurimit të Kombeve të Bashkuara duhet të zbatohet tani”, shtoi ai./abcnews.al
