Nga Erblina Mile
Sipërmarrjet shqiptare nuk janë gati për të nisur faturimin on-line në 1 janar të viti të ardhshëm. Kreu i Dhomës së Tregtisë dhe Industrisë Nikolin Jaka deklaron se ky është një vendim i njëanshëm i qeverisë dhe janë të painformuar.Sipas Jakës një nismë e tillë do të rëndojë edhe më shumë biznesin i cili po lëngon për shkak të pandemisë.
“Megjithëse është një debat ajo që më bën përshtypje është mënyra e vendosjes së gjërave. Ka gjithmonë një mënyrë të njëanshme dhe kjo është shumë e rrezikshme”, thotë Jaka.
Kreu i dhomës së tregtisë bën apel që një nismë e tillë të shtyhet deri në stabilizim të situatës së krijuar nga pandemia. Biznesi në vend po përballen me ulje të ndjeshme të fitimeve dhe një kosto e tillë do të ishte e padrejtë.
“Unë mendoj se duhet të shtyhet. Për të kaluar situatën ku ne ndodhemi. Vetëm në Shqipëri ngrejnë armët, që sa herë ndodh një gjë në Shqipëri fajin e kanë bizneset”, thekson ai.
Sipas Jakës institucionet shqiptare nuk kanë ende një vlerësim të saktë se çfarë impakti do të ketë në faturimi online në uljen e informalitetit.
Në 1 janar do të nisë procesi i fiskalizimit për rreth 7600 subjekte që kryejnë transaksione me shtetin,në 1 korrik do shtrihet për kategorinë biznes me biznes dhe në 1 shtator për të gjitha transaksionet. Në zonat ku nuk do të ketë mbulim interneti parashikohet dorëzimi i të dhënave në mënyrë fizike ndërsa një kosto fillestare e vendosjes së softëerit përllogaritet të shkojë deri ne 500 euro. /abcnews.al
