Epic OneWater Brew është një birrë ndryshe nga të gjitha ato që ne njohim sepse prodhohet me një përbërës të çuditshëm: me ujë të ricikluar nga dushet, lavamanët dhe lavatriçet e një ndërtese banimi.
Birra është e sigurt për t’u pirë, falë një trajtimi që përfshin mikrofiltrimin dhe dritën UV, dhe synon të tërheqë vëmendjen ndaj çështjes së mungesës së ujit dhe ripërdorimit të ujit.
“Ndërtesat në mbarë botën përdorin 14 për qind të të gjithë ujit të pijshëm,” thotë Aaron Tartakovsky, CEO dhe bashkëthemelues i Epic Cleantec, kompania e trajtimit të ujit me qendër në San Francisko që e prodhoi birrën në partneritet me një fabrikë birre lokale. “Pothuajse asnjë ndërtesë nuk e ripërdor atë ujë, kjo është ajo që ne po përpiqemi të ndryshojmë.”
Birra është një birrë e stilit Kölsch, një pije e freskët, me trup të lehtë me origjinë nga Gjermania, dhe u krijua me ujë gri të ricikluar nga Fifteen Fifty, një ndërtesë apartamentesh luksoze 40-katëshe në San Francisko. Por nuk është në shitje, pasi rregulloret ndalojnë përdorimin e ujërave të zeza të ricikluara në pijet komerciale. Të paktën tani për tani.
Epic Cleantec pajis ndërtesat me sistemin e riciklimit të ujit, duke eliminuar nevojën për shkarkimin e ujërave të zeza në një sistem kanalizimi për transport në një strukturë trajtimi në distancë. Sistemi riciklon deri në 95% të ujërave të zeza, sipas kompanisë, ose atë që njihet si uji i zi, i cili vjen nga tualetet, ose uji gri, i cili vjen nga lavamanet, lavatriçet, vaskat dhe dushet.
Epic Cleantec nisi projektin e birrës së ricikluar në fund të 2022 për të pranishmit në një konferencë mbi teknologjitë e qëndrueshme të ndërtimit./abcnews.al
