Loading ...
Ky klasifikim është i rëndësishëm, ndonëse nuk është gjithçka. Kombëtarja shqiptare e futbollit ndoshta mund të mërzitet pak sepse ka humbur dy vende në renditjen botërore të FIFA-s për periudhën nga 17 tetori deri në 19 nëntor, por pikërisht këtë muaj realizoi diçka që nuk e kishte bërë kurrë, u kualifikua për në plej ofin e Kupës së Botës.
Kuqezinjtë janë në vendin e 63-të të tabelës planetare, me 1401.7 pikë, 0.27 pikë më pak sesa në tetor.
Kjo sepse fitorja me Andorrën, edhe pse na dha kualifikimin, vlen pak për shkak të nivelit të rivalit, ndërsa ndeshja tjetër ndaj Anglisë u humb.
Do të kishte qenë krejt tjetër nëse do t’u kishim marrë pikë nënkampionëve të Europës.
Natyrisht, janë hequr pikët e periudhës shtator-tetor, kur fituam në Serbi. Kosova ndërkaq vazhdon ngjitjen dhe vendosi një rekord.
Për herë të parë mban vendin e 80-të në renditjen e FIFA-s, me plus 4 vende në krahasim me muajin e kaluar, dhe me 11 vende në krahasim me shtatorin.
Skuadra e trajnerit Franko Foda e arriti këtë me fitoren 2-0 në Slloveni dhe barazimin 1-1 kundër Zvicrës.
Le të kujtojmë se një vit më parë, “dardanët” ishin në vendin e 101-të, pra ka ngjitje me 21 pozicione. Renditjen Botërore e kryeson Spanja, kampione e Europës, e ndjekur nga Argjentina kampione e botës dhe nga Franca, Anglia e Brazili.
