Nga Ajgena Korbi
Të diplomuarit në të gjitha nivelet e arsimit në vend po vijnë në rrudhje. Vitin e fundit akademik mbaruan shkollën rreth 96 mijë nxënës dhe studentë ose 2.2% më pak se një vit para.
Instituti i Statistikave në të dhënat e fundit të publikuara ka nxjerr në pah uljen e numrit të të diplomuarve në të gjitha nivelet e arsimit, atë 9 vjeçar, të mesëm dhe të lartë. Rënie e ndjeshme e numrit të nxënësve vihet re në arsimin bazë.
Rreth 32 mijë fëmijë lanë bankat e shkollave 9 vjeçare vitin 2020 – 2021 duke shënuar një ulje me 4.3% krahasuar më vitin e para.
Nga të diplomuarit në këtë cikël arsimor 52,9 % ishin djem dhe 47,1 % vajza. Rreth një mijë prej tyre referuar shifrave të Institutit të Statistikave nuk e vijuan ose përfunduan arsimin e mesëm. Të paktën brenda vendit.
Nga bankat e gjimnazeve vjet dolën rreth 31 mijë nxënës. Bie në sy se 12.3% e të diplomuarve mbaruan shkollat profesionale. Ndryshe nga shkolla 9 vjeçare arsimin e mesëm e përfunduan më shumë vajza.
Rënie ka pësuar dhe numri I studentëve. Ndonëse më pak e ndjeshme se në dy ciklet bazë të studimit. Rreth 32 mijë e 690 të rinj morën diplomën e shkollës së lartë vjet duke shënuar një ulje me 0.6% krahasuar me vitin 2019-2020.
Më shumë se gjysma e tyre përfunduan programin Bachelor dhe rreth 40% atë Master. 66% e të rinjve që mbaruan universitetin ishin vajza. Mbi ¼ e studentëve u diplomuan për biznes, administrim dhe ligj. Për djemtë më pas më të pëlqyera ishin degët e inxhinierisë, të shërbimeve dhe teknologjia e informacionit ndërsa për vajzat arsimi, artet dhe shkencat sociale.
Sipas ekspertëve të arsimit dy janë arsyet kryesore për rënien e numrit të nxënësve në shkollat e vendit, ulja e numrit të lindjeve dhe emigracioni.
TË DIPLOMUAR NË VITIN 2020-2021
Arsimi 9 vjeçar 32.179 nxënës
Arsimi I mesëm 31. 136 nxënës
Arsimi I lartë 32.690 studentë
/abcnews.al
