Loading ...
Presidenti amerikan Joe Biden ka thënë se vendi i tij do të ndërmarrë “veprime” nëse konsideron se Kina “kërcënon” “sovranitetin e saj kombëtar”.
Në sfondin e përkeqësimit të mëtejshëm në ditët e fundit të marrëdhënieve midis Uashingtonit dhe Pekinit, për shkak të fluturimit të një balone kineze mbi territorin amerikan, i cili u rrëzua.
Çfarë tha Biden në fjalimin e tij?
Biden, gjatë fjalimit kujtoi premtimin e tij për të bashkëpunuar me qeverinë kineze në fushat ku mendon se kjo i shërben “SHBA-së dhe “është e dobishme për pjesën tjetër të botës”.
“Por mos bëni gabim: siç e bëmë shumë të qartë javën e kaluar, nëse Kina kërcënon sovranitetin tonë kombëtar, ne do të ndërmarrim veprime për të mbrojtur vendin tonë. Dhe ne e bëmë atë”, shtoi ai.
Të dielën, autoritetet amerikane njoftuan se një avion luftarak rrëzoi një balonë kineze, të cilën e përshkroi si spiune, pas disa ditësh në hapësirën ajrore të SHBA-së.
Rrëzimi nga një avion luftarak ndodhi mbi Oqeanin Atlantik, pranë Karolinës së Jugut.
Kina, nga ana e saj, u kundërpërgjigj se balona ishte shkencore, duke mbledhur të dhëna meteorologjike, por devijoi nga kursi i saj dhe kritikoi forcat e armatosura amerikane, sepse ato reaguan ndaj tij në një mënyrë “të tepruar”.
Pekini refuzoi të shtunën një kërkesë të Sekretarit të Mbrojtjes së SHBA, Lloyd Austin për një telefonatë me homologun e tij kinez Ëei Fangha, tha një zëdhënës i Pentagonit të SHBA disa orë përpara fjalimit të Joe Biden.
Biden për Xi Jinping
Presidenti amerikan kujtoi se i ka vënë në dukje homologut të tij Xi Jinping se SHBA kërkon konkurrencë, jo konflikt me Kinën.
“Unë nuk do të kërkoj falje për investimin për ta bërë Amerikën më të fortë. Ne po investojmë në inovacionin amerikan, në industritë që do të përcaktojnë të ardhmen, në të cilën qeveria kineze synon të bëhet dominuese,”tha ai.
Bota sot përballet me sfida serioze, theksoi Biden, duke iu rikthyer temës së tij të konfrontimit mes “demokracive” dhe “regjimeve autoritare”.
“Në dy vitet e fundit, demokracitë janë bërë më të forta, jo më të dobëta. Dhe regjimet autoritare janë bërë më të dobëta, jo më të forta”, theksoi ai.
“Aleatët e SHBA-së po shtohen, po shpenzojnë më shumë dhe po bëjnë më shumë. Po ndërtohen ura midis partnerëve në Paqësor dhe atyre në Atlantik. Dhe ata që vunë bast kundër Amerikës po kuptojnë se sa gabim ishin”, shtoi ai.
“Nuk është kurrë një ide e mirë të vësh bast kundër Amerikës”, tha ai.
Komentet e Biden erdhën pasi Sekretari i Shtetit i administratës së tij, Anthony Blinken, i cili ishte i pranishëm në fjalimin, anuloi vizitën e tij në Kinë.
Republikanët, të cilët morën kontrollin e Dhomës së Përfaqësuesve në janar pas zgjedhjeve afatmesme në nëntor, kanë kërkuar masa më të ashpra ndaj Kinës. Madje ata kritikuan ashpër Presidentin Biden që fillimisht urdhëroi që balona të mos rrëzohej, për të shmangur dëmtimet në tokë.
Biden vlerësoi gjithashtu projektligjin e vitit 2022 me mbështetje të fortë dypartiake në fjalimin e tij për të nxitur investimet në industrinë e gjysmëpërçuesve të SHBA.
Shtëpia e Bardhë ka kërkuar më parë të de-përshkallëzojë tensionet me Pekinin, të cilat u përshkallëzuan kur ish-kryetarja e Dhomës Demokratike Nancy Pelosi vizitoi Tajvanin gjatë verës.
Vizita shkaktoi zemërim në Kinë dhe e shtyu atë të zhvillonte stërvitjet ushtarake më të gjera në histori rreth ishullit prej 23 milionë banorësh, të cilin qeveria kineze e ka karakterizuar gjithmonë si një provincë të shkëputur kineze të destinuar për t’u ribashkuar me kontinentin në të ardhmen, edhe me forcë nëse do të jetë e nevojshme.
Tensionet në marrëdhëniet dypalëshe ka të ngjarë të arrijnë një kulm të ri nëse kryetari i ri i Dhomës së Përfaqësuesve, Kevin McCarthy, viziton Taipei këtë vit.
Presidenti amerikan theksoi se SHBA është “në pozitën më të fortë në dekada për të konkurruar me Kinën dhe këdo tjetër në botë”.
/abcnews.al
