Gjykata e Shkallës së Parë ka dorëzuar në Gjykatën e Apelit ankimimet e ish-kryeministrit Sali Berisha dhe dhëndrit të tij, Jamarbër Malltezi, të cilët kërkojnë shuarje të masës së sigurisë. Gjyqtarja Ilirijana Olldashi do të vendosë më 20 nëntor në 9:00 për kërkesën e avokatëve të Berishës për ndryshim dhe shuarje të masave të caktuara për Berishën ndërsa kjo datë përkon edhe me ditën kur ish-kryeministri duhet të paraqitet në prokurorinë e posaccme në zbatim të vendimit të gjykatës dhënë më datën 26 tetor.
Më herët mbrojtës të Berishës dorëzuan në sekretarinë e Gjykatës së Posaçme ankimimin e plotë ku kundërshtohen vendimet për masën e sigurimit personal “detyrim me paraqitje” dhe bllokim të pasaportës . Të njëjtën kërkesë për shuarje ose ndryshim të masës së sigurisë kanë depozituar në gjykatën e apelit edhe avokatët e Jamarbër Malltezi, që po mbahet në burg për akuzën e korrupsionit dhe pastrimit të parave.
Nga selia e tij, Berisha njoftoi se nuk do të ndryshojë kurs.
Gjykata e posaccme është përpjekur ta gjejë Sali Berishën, edhe në Kuvendin e Shqipërisë, pasi dështoi të marrë firmën e tij në seli e shtëpi, për ta vënë në dijeni për masat e sigurisë. Gjykata dërgoi në Kuvend dy shkresa, të cilat i adresoheshin shtetasit nën hetim Sali Berisha: një ku njihej me detyrimin për tu paraqitur dhe për të mos dalë jashtë vendit, dhe një të dytë për tu saktësuar se këto masa shtërnguese ndaj tij janë në fuqi, përkundër pretendimit të avokatëve të Berishës.
Por Sali Berisha nuk i ka marrë këto dokumente, edhe pse Kuvendi i Shqipërisë e ka njoftuar përmes emailit zyrtar deputetin se i kanë ardhur dy zarfe.
Mandej, administrata e Kuvendit, duke qenë se Berisha nuk ka një zyrë e as një grup në Parlament, zarfet e pahapura, ja ka përcjellë ish-kryeministrit me postë për në selinë blu.
Berisha ja mbylli derën postjerit të Kuvendit, përmes një deklarate për gazetarët.
