Oficerët e Policisë Gjyqësore shkuan paraditen e se premtes në banesën e Sali Berishës, në rrugën “Mustafa Matohiti”, për të kontrolluar zbatimin e mases se sigurise ndaj ish kryeministrit nen hetim per korrupsion.
I pranishëm për këtë kontroll ishte edhe vetë drejtori i krimit ekonomik në Policinë e Tiranës, Erion Ismaili, Drejtori e ngarkuar për të mbikëqyrur zbatimin e masës së sigurisë ‘’arrest në shtëpi’’ për Sali Berishën.
Vetë Berisha është gjetur në banesë, ashtu siç i ka kërkuar edhe Gjykata, ndërsa grupi I oficerëve do të përpilojë të dhënat dhe më pas gjetjet do t’ja rapotojë dy prokurorëve të Posaçëm, Arben Kraja dhe Enkeleda Millonai.
Ashtu siç u veprua të premten, oficerët e policisë pritet që vazhdimisht të shkojnë për kontroll në banesën e Berishës, ndërsa të gjitha lëvizjet e tij pritet të raportohen në SPAK.
Pavarësisht se gjykata e Posacme e ka urdhëruar Sali Berishën, të mos komunikojë me persona të tjerë përveç atyre që bashkëjetojnë në të njëjtën banesë me të, ai prej disa ditësh mban fjalime nga ballkoni I baneses, për simpatizantët e tij që mblidhen poshtë pallatit.
Një ditë më parë ministri I Brendshëm Taulant Balla i quajti të papranueshme veprimet e Berishës pasi sipas tij, masa e sigurisë së arrestit në shtëpi ka të gjitha ndalimet si në burg.
Ish kryeministri Sali Berisha është person nën hetim për korrupsion lidhur me privatizimin e ish kompleksit Partizani pasi dyshohet se me veprimet e tij ka favorizuar dhëndrin Jamarbër Malltezi, një ndër pronarët e truallit ku shtrihej kompleksi sportiv.
