Loading ...Kush ankohet në PD për Endri Shabanin?
Berisha thotë jo, Gazment Bardhi thotë po. Një ditë më parë doktori pranoi gabimin me Endri Shabanin, por ankesat për zgjedhjet e tij i mbajti vetëm në nivel politik, jo juridik.
“Jo, nuk do e çojmë në Gjykatë Kushtetuese, për ça ta çojmë? Nuk pyet ai për GJykatë Kushtetuese”
Por Gazment Bardhi ka dhënë tjetër direktivë. Ai shkruan se përpos një kallëzimi penal për kryetarin e parlamentit, Niko Peleshi, do të ankohet për zgjedhjen e Avokatit të Popullit në Gjykatë Kushtetuese.
“Do të kërkoj nga grupi parlamentar autorizimin përkatës për t’iu drejtuar Gjykatës Kushtetuese për të verifikuar zgjedhjen e Avokatit të Popullit përmes një procedure parlamentare tërësisht të paligjshme”
Por a do t’i mbledhë dot 25 firmat?
Gabimi me firmat për Shabanin nisi pikërisht nga grupi parlamentar, kur 35 deputetë i dhanë firmat Shabanit.
Në fakt, Gazment Bardhi është vetë kryetari i grupit parlamentar.
Deputetë si Saimir Korreshi thane publikisht se për të firmosur për Endri Shabanin, kishin marrë miratimin e Gazmend Bardhit.
Por me këtë veprim të ri, Gazmend Bardhi del edhe zyrtarisht mbi doktorin.
Dikush kërkon të rregullojë gabimin, edhe pse Berisha e pranoi se nuk ishte gabim, por pazar vote për kandidatin e Tiranës, Florian Binajn.
Por gabim ose jo, nga Elbasani, Berisha i dha mesazhin Bardhit se kush vendos pikat mbi i, si në PD, si per Avokatin e Popullit.
“Gabimi ishte shumë, ajo që ju patë dhe unë e kuptoj që jeni të mërzitur me këto firmat ndaj Shabanit, avokatit të Edi Ramës dhe ju kërkoj ndjesë juve dhe të gjithë shqiptarëve për ato firma që u vunë.
Secili që firmosi e tërhoqi firmën, por natyrisht Edi Rama në mënyrë të paskrupull e zgjodhi, e gëzoftë.”
Edi Rama ta gëzoje Endri Shabanin. Por Gazmend Bardhi nuk e gëzoi dot pushtetin që i dha vetes nga Amerika mbi doktorin, më shumë se 60 minuta./abcnews.al
