Pjesëmarrja e Anxhela Peristerit ka tërhequr vëmendjen e mediave serbe. Simboli i shqiponjës dykrenare që Anxhela ka bërë gjatë një paraqitjeje para mediave ka revoltuar serbët, të cilët e kanë cilësuar veprimin e saj si një provokim.
“Në prag të mbrëmjes së parë gjysmëfinale të Eurovision, e cila po mbahet në Hollandë në Roterdam, kishte një skandal kur përfaqësuesja e Shqipërisë, Anxhela Peristeri, doli para shtypit dhe tregoi simbolin e Shqipërisë së Madhe, “Shqiponja me dy koka”.” shkruan Blic.
Sakaq, dhe paraqitja e këngëtares shqiptare me fustanin e kuq, ku u vlerësua si e veshura më mirë mes pjesëmarrësve, ka bërë bujë në mediat serbe. “Srbijadanas” shkruan se Anxhela ka kopjuar këngëtaren Lepa Brena.
“Përfaqësuesja e Shqipërisë në konkursin muzikor “Eurovision” në Roterdam, e cila bëri një skandal kur tregoi një shqiponjë dykrenare, një simbol të të ashtuquajturës Shqipëri e Madhe, në tapetin e kuq, kopjoi Lepa Brena-n.” /abcnews.al
