Miliarderi amerikan Elon Musk nuk është përzgjedhur për Çmimin prestigjioz Evropian të të Drejtave të Njeriut Sakharov 2024, pavarësisht nga një fushatë e ekstremit të djathtë që vlerëson qëndrimin e tij të fortë ndaj lirisë së fjalës.
Musk u nominua nga dy grupe të ekstremit të djathtë në Parlamentin Evropian për çmimin Sakharov, i cili dikur iu dha, ndër të tjera, Nelson Mandela dhe Malala Yousafzai. Deputetët e ekstremit të djathtë zgjodhën pronarin e platformës X (Twitter) si një “simbol” në luftën për lirinë e shprehjes dhe për përpjekjet e tij në luftën kundër “islamizmit radikal dhe voksizmit”, tha ligjvënësi francez i BE-së Thierry Mariani, një mbështetës kryesor i nominimit të Musk.
Manjati i teknologjisë që drejton X (Twitter), Tesla dhe SpaceX ka luftuar me zyrtarë dhe rregullatorë në mbarë botën për menaxhimin e tij të platformës X. Anëtarët e komitetit të punëve të jashtme të Parlamentit Evropian në një votim të fshehtë zgjodhën aktivistin kundër korrupsionit nga Azerbajxhani Gubad Ibadoglu, lideren e opozitës venezueliane María Corina Machado dhe kandidatin presidencial në mërgim Edmundo González dhe organizatat e paqes izraelite dhe palestineze “Women Wage Peace” dhe “Women of Sun” si kandidatë për listën e ngushtë.
Konferenca e Presidentëve do të zgjedhë laureatin për vitin 2024 më 24 tetor dhe ceremonia e ndarjes së çmimeve do të mbahet në seancën plenare në Strasburg në dhjetor. Çmimi u jepet individëve apo organizatave që kanë kontribuar ndjeshëm në mbrojtjen e lirisë së shprehjes, demokracisë apo të drejtave të pakicave dhe përfshin një çmim prej 50,000 euro. Kandidatët e përzgjedhur tradicionalisht marrin ftesë për të marrë pjesë në ceremoninë e ndarjes së çmimeve në Parlamentin Evropian./abcnews.al
