Presidenti i Shqipërisë, Ilir Meta, ka nderuar me titullin “Nderi i Kombit” ish-futbollistin Sabah Bizi. Në faqen e tij zyrtare në Facebook, presidenti i vendit shkroi:
“Sabah Bizi është një nga legjendat dhe talentet më të mëdha të futbollit shqiptar, titullar i ‘Vllaznisë’, i ‘Partizanit’ dhe i Ekipeve tona Kombëtare, nga ata futbollistë, të cilët lindin shumë rrallë, që me punën, aftësinë e përkushtimin e Tij ka kontribuar në rezultatet më të larta kombëtare dhe ndërkombëtare, por dhe në rritjen e krenarisë dhe të imazhit tonë kombëtar.
Në treshen e artë të ‘Vllaznisë’: Bizi-Rragami-Zhega ai ishte gjithçka në formacionin e saj, por gjithashtu edhe në Kombëtaret tona.
Pa ngurrim mund të themi se Bizi është futbollisti më i gjithanshëm në historinë e futbollit tonë.
Me mesfushorin ai solli tiparet moderne të këtij roli duke qenë njeriu që udhëhiqte gjithë skuadrën.
E kujtojmë Bizin për atë teknikë racionale, të milimetruar, për atë kilometrazh lëvizjeje në gjithë fushën si askush tjetër, për atë pasim të pagabueshëm, organizator e bllokues i njëkohshëm dhe golashënues i saktë përmes golave që nuk harrohen ende sot.
Për talentin e jashtëzakonshëm dhe kontributin e çmuar në arritjen e rezultateve të larta në futboll me Ekipin Kombëtar dhe ekipet “Vllaznia” e “Partizani”, si legjendë e fushës së blertë i përmasave europiane në historinë e futbollit tonë, personalitet i dashur e i respektuar, si dhe burim frymëzimi për të gjithë brezat e rinj, pata sot nderin dhe privilegjin ta vlerësoj Sabah Bizin, pikërisht në qytetin e tij, në Shkodrën tonë të dashur, me Titullin e lartë “Nderi i Kombit”./abcnews.al
