Loading ...
Komisioni Evropian prezantoi sot një paketë të re automobilistike e cila synon t’u japë prodhuesve të makinave më shumë fleksibilitet për të arritur objektivat e emetimeve të dioksiodit të karbonit, duke forcuar njëkohësisht mbështetjen për automjetet dhe bateritë e prodhuara në BE.
Paketa ruan angazhimin e bllokut për neutralitet klimatik deri në vitin 2050 dhe mobilitet të pastër deri në 2035, por sjell fleksibilitete të reja në rregullat e emetimeve për makina, furgona dhe automjete të rënda, së bashku me masa për reduktime burokratike dhe forcimin e industrisë së baterive në Evropë, thuhet në një deklaratë.
Nën kuadrin e rishikuar, prodhuesit e makinave do të jenë ende të detyruar të arrijnë reduktim prej 90 për qind të emetimeve deri në vitin 2035. Megjithatë, 10 për qind e mbetur e emetimeve mund të kompensohet përmes përdorimit të çelikut me karbon të ulët të prodhuar në BE, si dhe elektrokarburanteve dhe biokarburanteve.
Ky fleksibilitet lejon që teknologjitë si hibridët me lidhje elektrike, zgjatësit e distancës dhe automjetet me motor djegës të mbeten në treg përkrah automjeteve elektrike dhe atyre me hidrogjen.
Për të lehtësuar presionin afatshkurtër, Komisioni prezantoi “super kredi” për makinat elektrike të vogla dhe të përballueshme të prodhuara në BE, një sistem bankimi dhe huazimi për periudhën 2030–2032, dhe uli objektivin e reduktimit të CO2-shit për furgonët deri në 2030 nga 50 për qind në 40 për qind.
Paketa përfshin gjithashtu një “Nxitës Baterish” prej 1,8 miliard eurosh për të fuqizuar zinxhirin e vlerës së baterive në BE dhe një “Omnibus Automobilistik” që pritet të ulë kostot administrative për prodhuesit me rreth 706 milionë euro në vit.
Masat përfshijnë procedura të thjeshtuara testimi, përjashtime për furgonët elektrikë nga disa kërkesa rregullatore dhe heqjen e rregulloreve të përsëritura të zhurmës.
Gjatë një konference për shtyp në Parlamentin Evropian në Strasburg, Nënkryetari Ekzekutiv i Komisionit Evropian, Stephane Sejourne, tha se objektivi i dekarbonizimit deri në 2035 mbetet i pandryshuar, por “modalitetet e llogaritjes po ndryshojnë”, duke prezantuar fleksibilitete që nuk e dëmtojnë qëllimin e përgjithshëm klimatik.
Komisari evropian për Klimën, Wopke Hoekstra, e përshkroi paketën si “ambicioze, të balancuar dhe pragmatike”, duke thënë se ajo adreson shqetësimet e industrisë, ndërsa ruan parashikueshmërinë e investimeve në sektorin e automjeteve elektrike dhe respekton ligjin klimatik të BE-së.
Valdis Dombrovskis, komisari evropian për Ekonominë dhe Produktivitetin, tha se rregullat e rishikuara prezantojnë “neutralitet real teknologjik”, duke u dhënë konsumatorëve më shumë zgjedhje dhe prodhuesve më shumë fleksibilitet, pa braktisur objektivat klimatike.
