Evertoni ka bërë një merkato cilësore, në stol ka një mjeshtër si Carlo Ancelotti dhe tifozët presin një sezon spektakolar nga ekipi i tyre i zemrës. Sfida e parë shkoi në mënyrën e duhur, teksa Evertoni fitoi 0-1 jashtë fushe kundër Tottenhamit të Mourinhos.
Tre pikë të rëndësishme ndaj një rivali shumë të vështirë falë golit të Dominic Calvert-Lewin, rezultat që ka krijuar entuziazëm në ekipin nga Liverpuli. Carlo Ancelotti vlerëson repartin e mesfushës në konferencën për shtypin, aty ku shfaqet në formë dhe nuk e kursen batutën.
“Kemi shumë cilësi në mesfushë: Andres Gomes, James Rodriguez, Allan që është një lojtar shumë i mirë, por edhe Doucoure, i cili bën një punë fantastike në të gjithë fushën. Kombinimet mes lojtarëve në mesin e fushës janë shumë të mira.
Edhe sezonin e kaluar kishim shumë cilësi në këtë repart. Sidomos kur topin e kishim ne, por në futboll ka një rëndësi të madhe edhe loja pa top. Duhet të dish të luash futboll edhe kur topin e zotëron ekipi kundërshtar.
A u përshtat James me shpejtësinë e Premier League? Nuk jam i shqetësuar për diçka të tillë. Nëse do të isha, do të kisha firmosur me Usain Bolt dhe jo me James Rodriguez“, deklaron trajneri i Everton. /abcnews.al
