Nisma për shtimin e gjelbërimit në Tiranë është zhvendosur në zonën e Kombinatit. Kryetari i Bashkisë mori pjesë në krijimin e disa lulishteve në rrugën “Musine Kokalari” dhe u bëri thirrje qytetarëve të kontribuojnë për të thyer rekordin e mbjelljes së pemëve sezonin e kaluar.
Pas rehabilitimit të bllokut të banimit pranë rrugës “Musine Kokalari” në Kombinat bashkia ka nisur punën për krijimin e mini lulishteve si mjedise çlodhëse për banorët e kësaj zone. Kryetari i Bashkise Erion Veliaj përsëriti synimin për të mbjellë 150 mijë këtë sezon, ndërkohë që theksoi se nisma mund të bëhet realitet me kontributin e të gjithëve.
Erion Veliaj, Kryetar i Bashkisë së Tiranës: “Ne kemi një nismë fantastike për të kapur këtë vit 150 mijë pemë dhe ju mund të thoni se 150 mijë pemë nuk mbillen brenda ditës. Sigurisht, ndaj 20 sot, 200 nesër, e nëse vazhdojmë me këtë ritëm, sigurisht që do ta kapim rekordin. Kjo është një lagje fantastike e Tiranës, quhet zona “Musine Kokalari” sepse është afër shkollës. Siç e shihni jemi në hapat e fundit, kemi mbaruar konturimin, janë liruar kthesat e pallateve dhe hapësirat publike nga zaptimet, janë vendosur stolat e rinj, pllaka të reja, sinjalistika. Kishte ardhur koha e qershisë mbi tortë, gjelbërimi i zonës”.
Njësia administrative numër gjashtë në Tiranë sipas kryetarit të bashkisë, është një nga zonat ku është investuar më shumë. Megjithkëtë Veliaj premtoi realizimin e të tjera projekteve.
“Do të vazhdojmë me investimin te “Misto Mame”, për të përfunduar këtë vit me këto dy blloqe dhe aksin kryesor të Kombinatit, e pastaj për të vazhduar vitin tjetër në të gjithë zonën e Astirit dhe në të dy krahët e “Rrugës së Kombinatit”.
Për të mundësuar plotësimin me bimësi dekorative të këtij blloku banimi është parashikuar të mbillen 150 pemë dekorative./abcnews.al
