Opozita joparlamentare do të mbajë sot protestën kombëtare të radhës, në orën 19.00 para kryeministrisë. Kryetari i partisë demokratike, teksa ka shpërndarë në rrjetet sociale spotin e kësaj proteste, bën thirrje për pjesëmarrje masive.
“Bashkimi, pjesëmarrja dhe vendosmëria për ta çuar këtë betejë drejt fitores së sigurt, është investimi më krenar për fëmijët, për të ardhmen e tyre dhe të cdo shqiptari”, u drejtohet Basha.
Ai shkruan se në këtë tubim të madh kombëtar duhet të marrin pjesë të gjithë shqiptarët që duan një të ardhme më të mirë për fëmijët e tyre, ndërsa theksoi se nuk do të ketë as hap prapa.
Ndërkohë, gazetari i ABC News Andi Qosja ka mësuar se për protestën e sotme janë angazhuar rreth 1700 efektivë të policisë së Shtetit, Forcave të Ndërhyrjes së Shpejtë dhe të Gardës së Republikës.
Tubimi pritet të nisë në orën 19.00 dhe sipas informacionit të deritanishëm do të mbahet para kryeministrisë. Nuk dihet ende itinerari që do të ndjekin protestuesit gjatë orëve të protestës./ABC News Albania 24/7
