Gjatë një fjalimi në protestën e opozitës që po zhvillohet këtë të martë para parlamentit, kreu i PD-së, Lulzim Basha tha se tha se beteja e opozitës është pa kthim. Ai theksoi se opozita lufton për zgjedhje të lira dhe të ndershme.
“Ne nuk frikësohemi. Ne nuk ligështohemi sepse ne luftojmë për një kauzë të drejtë. Ne luftojmë për një mision të madh, për fëmijët e shqiptarëve dhe për të nesërmen e tyre europiane. Ne luftojmë për liri, ne luftojmë për demokraci, ne luftojmë për zgjedhje të lira e të ndershme dhe përballë kemi një shtet që nuk është më i shqiptarëve, një Republikë të krimit, të cilin do ta shembim nga themelet. Ky vend ka dy rrugë, të pranojë skllavërinë e krimit dhe tiranisë me kokën dhe zërin e Maduros së Ballkanit, ose të ngrihen të gjithë njëzëri si një trup, toskë e gegë, myslimanë dhe të krishterë, demokratë e socialistë dhe të marrim në dorë fatin tonë. Beteja është pa kthim dhe historia e gjatë dhe e shkurtër e këtij vendi na rrëfen si do përfundojë kjo betejë me shporrjen e qeverisë së krimit dhe triumfin e lirisë, demokracisë dhe vlerave europiane për të gjithë shqiptarët”, tha Basha.
Protestën e paralajmëruar për të enjten, opozita e bashkuar po e zhvillon këtë pasdite, para parlamentit. Të organizuar nga Partia Demokratike menjëherë pasi Kuvendi vendosi të zhvendosë mbajtjen e seancës plenare për orën 17:00 të ditës së sotme, qindra protestues u mbledhën para godinës së parlamentit, duke kërkuar largimin e kryeministrit Edi Rama./abcnews.al
