Gjykata ka vendosur masën arrest me burg për pesë personat e arrestuar për plagosjen e Johan Muçllarit në Pogradec, tre ditë më parë më 26 prill.
Të arrestuarit për moskallëzim krimi janë Fatjon Bono 21 vjeç, Kristian Kresto, Hekuran Gjona, Ledion Shkullaku dhe Rudi Shaho.
Lexo edhe: Atentati në Pogradec, 5 të arrestuar, ndihmuan autorët të largohen: Sekuestrohen 3 makina
Këta persona në bashkëpunim me njëri-tjetrin, me automjete dhe me veprime aktive, kanë ndihmuar autorët e ngjarjes, që të largohen nga vendngjarja.
Abcnews.al mëson se të arrestuarit përmes avokatit kanë mohuar të kenë qenë në vendngjarje. Por pranojnë se kanë pasur njohje me autorin e atentatit.
Ndërkohë vijojnë të jenë në kërkim 2 autorët Firdeus Berberi dhe Griseld Maxhari të cilët akuzohen për veprat penale “Vrasja me dashje”, kryer në bashkëpunim, mbetur në tentativë, “Mbajtja pa leje dhe prodhimi i armëve, armëve shpërthyese dhe i municionit” dhe “Prishja e qetësisë publike”.
Lexo edhe: EMRAT/ I “forti” i Pogradecit në burg, i biri merr pistoletën dhe tenton të vrasë “hasmin”
Si ndodhi plagosja?
Plagosja ka ndodhur te pedonalja e qyteti të Pogradecit në zonën rezidenciale ku ndodhen hotelet e qytetit. Johan Muçllari u paraqit vetë në spitalin e Pogradecit me plagë plumbi në këmbë dhe me një tjetër plagë në kokë, të shkaktuar nga goditje me thikë. Pas marrjes së ndihmës së parë, i riu u dërgua në spitalin e Traumës në Tiranë. Sipas policisë, autorët e dyshuar të krimit janë Firdeus Berberi dhe Greis Maxhari.
Burimet i thanë abc-së se fillimisht të rinjtë kishin debatuar me fjalë mes tyre, por konflikti degradoi në sherr me grushte dhe në përdorimin e thikës. Më pas dyshohet se 20 vjeçari Firdeus Berberi qëlloi me armë drejt Muçllarit. Policia gjeti në vendngjarje një gëzhojë pistoletë.
Të njëjtat burime zyrtare nga policia e Pogradecit thanë se ka dyshime që edhe njëri nga autorët, Greis Maxhari, të jetë plagosur me thikë. Dy autorët u larguan nga vendngjarja në drejtim të Korçës me një automjet Golf, ngjyrë të errët dhe blutë e Pogradecit po punojnë për kapjen e tyre.
Familjet e dy të rinjve të përfshirë në këtë ngjarje, Berberi dhe Muçllari janë në konflikt mes tyre prej më shumë se dy vjetësh. Në gusht 2020, disa persona sulmuan me breshëri arme hotelin në pronësi të të atit të të plagosurit të sotëm, Jetmir Muçllari, pranë Drilonit. Fatmirësisht nga ky sulm ndaj godinës dhe makinave të parkuara nuk pati të lënduar edhe pse hoteli ishte plot me pushues, në kulm të sezonit turistik.
Lexo edhe: Erdhi me maskë, del videoja tjetër e breshërisë ndaj hotelit në Pogradec
Babai i Firdeus Berberit, Ilir Berberi u akuzua asokohe si një nga personat e përfshirë në këtë sulm me armë dhe u arrestua nga RENEA disa ditë më vonë, i fshehur në një çadër në pyllin e fshatit Vërdovë. Por kjo akuzë për 54 vjeçarin Ilir Berberi ka rënë dhe mbi të rëndon vetëm akuza armëmbajtje pa leje.
/abcnews.al/
