ABC News ka zbuluar ekskluzivisht se shënjestra dhe personi që ka mbetur i plagosur në atentatin me tritol mbrëmjen e sotme në Tiranë, është vëllai i Armando (Tonin) Gjinit, ish-ushtari i Met Kananit që u ekzekutua në Rrëshen.
Ndërkohë që nuk konfirmohet për persona të tjerë të lënduar.
Sakaq gazetarja Xhensila Kodra raportoi për Abc News se pista kryesore e hetimit është ajo e hakmarrjes pasi shënjestra e atentatit të sotëm mendohet se ka lidhje me vrasjen e Kastriot Reçit, ngjarje e ndodhur në janar të këtij viti, ende e pazbardhur.
Siç raportohet vëllezërit Gjini janë kundërshtarë të Kastriot Reçit.
Katër vite më parë Reçi u mor në pyetje si i dyshuar se ishte përfshirë në vrasjen e ndodhur në 9 Shtator të 2016, ku u vra ish-drejtori i OSHEE-së në qarkun e veriut, Sajmir Jaku.
Pas marrjes në pyetje, Reçi u la i lirë për mungesë provash.
Ekzekutimi i Sajmir Jakut do të pasonte me një zinxhir tjetër vrasjesh brenda e jashtë Shqipërisë, të gjitha pa autorë.
Shtatë muaj më pas, në 28 Prill po të 2017-ës në Romë të Italisë vritet Gasper Reçi, vëllai i Kastriot Reçit.
Sipas policisë Italiane, dy vëllezërit Reçi ishin të skeduar në trafikun e drogës.
Hakmarrja mes grupeve vijoi më tej.
Në 6 Shtator 2017, në Belgjikë vritet Kreshnik Gjini, nipi i Sajmir Jakut.
Ndërsa në 12 Gusht të 2019, po në Rrëshen vritet Tonin Gjini, i njohur edhe me emrat Armando e Antonio Gjini.
Të gjitha këto ngjarje, janë duke u hetuar në një pistë të vetme, hakmarrja.
Seriali i vrasjeve
-9 Shtator 2016 vritet Sajmir Jaku
-28 Prill 2017 vritet Gasper Reçi
-6 Shtator 2017 vritet Kreshnik Gjini (nipi i Sajmir Jakut)
-12 Gusht të 2019 vritet Tonin Gjini
-7 Janar 2020 vritet Kastriot Reçi.
N.D./abcnews.al
