Loading ...
Nuk e ka bërë ende hapin përfundimtar tek profesionistët.
Gjithsesi, Gabriel Ramaj i ka të gjitha letrat në rregull për t’u ngjitur në skenën e madhe të futbollit, dhe jo më kot është kapiten i Atalantës U20.
Mbrojtësi shqiptar i qendrës, në moshën 19-vjeçare po spikat në futbollin italian dhe admiruesit e tij kanë nisur të rreshtohen, e pritet të trokasin në dyert e klubit nga Bergamo.
Revista e shquar gjermane, “Kiker” i kushton një shkrim ku lajmëron se janë tre klube që e vlerësojnë dhe që i duan shërbimet e tij.
Së pari jepet Sent Galen nga Superliga e Zvicrës, dhe më pas rreshtohen Olimpik i Marsejës i Ligës së Parë të Francës, dhe Sllavia e Pragës, që luan në elitën e futbollit të Çekisë.
“Kiker” I referohet një medieje zvicerane, si dhe gazetarit Rudi Galeti.
Ramaj ka qenë kapiten tek Atalanta U19, por po ashtu në mjaft raste ka mbajtur shiritin edhe tek ekipi Shpresa I bergamaskëve, U20, dhe nuk e diskuton vendin në formacion.
Paraqitjet e tij në Serinë A për Shpresat, në Kupën e Italisë për moshat dhe në Championsin e të rinjve kanë qenë mjaft pozitive.
Gabriel Ramaj ka 4 gola dhe dy asistë në të gjithë nivelet e deritanishme, nga U17 deri në U20, ndërsa ende pritet të debutojë tek skuadra e të rriturve e Atalantës.
Me Shqipërinë U21 ka luajtur 8 ndeshje deri tani.
