Mjeku shqiptar në Gjermani, Drilon Çupi foli në “Radari Informativ” në “ABC” për situatën epidemiologjike në këtë shtet si edhe pezullimin e procesit të vaksinës me AstraZeneca.
Ai u shpreh se Gjermania ka vendosur pezullimin deri në 15 mars të vaksinës AstraZeneca, ndërsa theksoi se fenomeni i trombozës nuk është një fenomen që e solli vaksina.
“Procesi i vaksinimit në Gjermani ka ndaluar deri në 15 mars si pasojë e një vendimi nga Instituti Federal i Gjermanisë që është përgjegjës për vaksinat. Ndërkohë në 1,6 milion të vaksinuar në Gjermani me AstraZeneca janë evidentuar 7 raste, ku 6 prej tyre kanë pasur një trombozë, ndërsa një rast hemorragji në kokë dhe nga këto 7 raste, 3 kanë gjetur vdekjen. Fenomeni i trombozës nuk është një fenomen që e solli vaksina”, tha ai.
Gjatë intervistës, ai tha për gazetaren Jonida Shehu se vendimi për pezullimin e vaksinimit me AstraZeneca hasi shumë kundërshtime për shkak se u kërkua një ekspertizë për pacientët që humbën jetën.
“Vendimi i pezullimit të AstraZeneca pati shumë kundërshtime sepse u kërkua një ekspertizë për rastet në fjalë, por vaksinimi të mos ndalohej. Raporti i ekspertëve gjerman këshilluan pezullimin për shkak të një procesi të sigurisë për të shmangur vaksinimin. Në Gjermani deri sa të dalë vendimi i EMA do të vijojë vaksinimi me Pfizer” , shtoi më tej mjeku.
/abcnews.al/
