Nuk ka asgjë të sigurt, por shpresa mbetet.
Kristian Asllani mund të jetë titullar në ndeshjen më të rëndësishme të futbollit italian, atë mes Interit dhe Juventusit.
Është një derbi I Italisë, ashtu si Milan-Inter, dhe mesfushori kuqezi parashikohet nga mediat në Apenine si tepër I mundshëm për të qenë në terren që nga minuta e parë.
Së pari, sepse trajneri Simone Inzagi nuk do të ketë lojtarin titullar fiks për atë rol, në qendër të mesfushës.
Hakan Çalhanoglu është I dëmtuar, ndonëse Asllani nuk mund të thuhet se është në qind për qind të formës.
Në ndeshjen në Champions në fushën e Jang Bojsit, Inzagi aktivizoi në mesfushë Fratezin në qendër, dhe në krah të tij yjet e tjerë, Mkitarian dhe Barela.
Të shohim se çfarë do të bëjë këtë herë.
E vërteta është që futbollisti shqiptar është aktivizuar sërish pak këtë sezon.
Në total, ka 142 minuta në 8 ndeshje në Serinë A, ndonëse herën e fundit ishte I dëmtuar, dhe dy herë radhazi u la në stol.
Kjo, pas provës që u cilësua jo në nivelin e duhur ndaj Monzës, si dhe pas 27 minutave në derbin e humbur kundër Milanit.
Në Champions e ka parë fushën vetëm 20 minuta përballë Crvena Zvezdës, ishte në stol ndaj Sitit dhe I dëmtuar kundër Jang Bojsit.
Edicionin e kaluar, Asllani shënoi një gol dhe shërbeu dy asiste në Serinë A, duke qenë në po këtë nivel minutazhi si këtë herë.
Kënaqësia e vërtetë për të ka qenë kombëtarja shqiptare, sepse është aktivizuar në të katër ndeshjet e Ligës së Kombeve deri tani, duke shënuar edhe golin e fitores në Tbilisi kundër Gjeorgjisë.
