Loading ...Edison Memolla shkon në burg. Apeli i Gjykatë se Posaçme vendosi lënien në fuqi të dënimit me 1 vit burg dhënë nga shkalla e parë për kryetarin e bashkisë Rrogozhinë. Po ashtu Memolla do duhet që për 5 vitet e ardhshme të mos ushtrojë asnjë funksion publik.
Vendimi është i formës së prerë dhe pritet të ekzekutohet brenda ditës së hënë. Trupa gjykuese e përbërë nga gjyqtarët Florian Kalaja, Igerta Hysi dhe Daniela Shirka, nuk pranuan kërkesën për pafajësi apo dënim alternativ, shërbim prove për Memollën.
Kryebashkiaki i Rrogozhinës u regjistrua teksa ndikonte tek punonjësit e OSHEE për të mos i ndërprerë energjinë elektrike një abonenti debitor në këmbim të votave për zgjedhjet e pjesshme lokale të 6 marsit 2022.
Apeli i GJKKO la në fuqi edhe vendimet për 3 të pandehur të tjerë Blerim Xhamani dhe Isuf Tosku, të cilët u dënuan nga shkalla e parë përkatësisht me 1 vit dhe 8 muaj burg, ku për Toskun dënimi u pezullua duke u vendosur në shërbim prove. Në fuqi u la edhe dënimi për Ndriçim Tafxhafa që u dënua me 1 vit burg./abcnews.al
