Max Allegri pritet të rikthehet në stol dhe e ardhmja e tij quhet Premier League. Ish-trajneri i Juventusit po mëson gjuhën angleze dhe pret një telefonatë nga Manchester United ose Tottenham.
Më shumë mundësi ka për t’u ulur në stolin e “Djajve të Kuq”, të cilët ndodhen në një krizë rezultatesh. Ole Gunnar Solskjaer duhet të rikthejë ekipin te rezultatet pozitive, përndryshe pankina e tij rrezikohet shumë.
Allegri është gati për sfida të tilla dhe shpjegon stilin e tij të punës në një prononcim të dhënë gjatë Football Coaches Association. 52-vjeçari nuk heq dorë nga parimet e tij dhe shpjegon se si arrihet te suksesi i përbashkët.
“Kur zëvendësova Conten dhe u ula në pankinën e Juventusit, shumë njerëz mendonin se do digjja vetën, por nuk ndodhi kështu. Nuk arrin asgjë, nëse tenton t’i bësh të gjitha gjërat vetë. Nuk mund të bëj detyrën e mjekut, fizioterapistit dhe përgatitësit atletik. E kam patur gjithmonë parim rrethimin nga persona inteligjentë, madje si lojtar kam tentuar gjithmonë që të mësoj nga shokët e skuadrës.
Trajneri duhet të krijojë harmoni në ambientin e punës, të ndajë përgjegjësinë me të tjerët dhe të zgjidhë me bashkëpunim problemet që krijohen. Unë preferoj të dëgjoj shumë dhe të flas pak. E ardhmja? Po mësoj gjuhën angleze. Nuk di akoma ta flas mirë, por po punoj në këtë aspekt“, përfundon trajneri livornez. /abcnews.al
