Kryeministri hungarez Viktor Orban ka ftuar homologun e tij suedez të vizitojë Budapestin për bisedime që synojnë zgjidhjen e mosmarrëveshjeve mbi ratifikimin e kërkesës së Suedisë për t’u anëtarësuar në NATO, një proces i vonuar nga Hungaria dhe Turqia.
“Sot i dërgova një letër kryeministrit Ulf Kristerson për të vizituar Hungarinë për negociatat për anëtarësimin e Suedisë në NATO”, shkroi Orban në platformën X.
Hungaria dhe Turqia, të vetmet vende që ende nuk e kanë ratifikuar kërkesën suedeze, por e kanë miratuar në parim, po vonojnë anëtarësimin e Suedisë në NATO.
Shefi i tij i shtabit u ankua për qëndrimin e Suedisë javën e kaluar.
“Suedezët nuk kanë marrë asnjë masë për të ndërtuar një marrëdhënie miqësore” dhe për të fituar “besimin” e Hungarisë, tha Gergely Gulias, duke shprehur habinë e tij që anëtarësimi në NATO “nuk është një përparësi” për Stokholmin.
Suedia shpalli në maj 2022, në vazhdën e pushtimit rus të Ukrainës, kandidaturën e saj për në NATO, në të njëjtën kohë me Finlandën, e cila në prill u bë anëtarja e 31-të e aleancës Atlantike.
/abcnews.al
