Fitorja e Kamala Harris ndaj Donald Trump në debatin e mbrëmshëm të ABC Neës përpara zgjedhjeve të 5 nëntorit ishte përfundimtare.
Në analizën e tij, rrjeti amerikan CNN vë në dukje se që në momentin e parë që filloi transmetimi i debatit, Harris u duk se diktonte kushtet e debatit, duke e detyruar Trumpin t’i shtrëngonte dorën sapo ajo doli në skenë.
Nga këndvështrimi i Harris, debati nuk mund të kishte shkuar më mirë. 59 vjeçarja u shfaq plot energji dhe kishte një vizion pozitiv për të ardhmen. Nga ana tjetër, Trump dukej se nuk e kishte kontrollin e debatit.
Harris pati performancën më të mirë të karrierës së saj politike.
Sipas një sondazhi të fundit, gati një e treta e votuesve thanë se do të donin të dinin më shumë për Harris dhe performanca e saj dje duket se po rrit numrin e mbështetësve.
Trump, nga ana tjetër, shpesh dukej se do të dëshironte të kishte në krah ish-rivalin e tij, Joe Biden. Shpesh duhen ditë apo edhe javë që një debat presidencial të depërtojë thellë në elektorat dhe të krijohen përshtypje.
Kandidatët që triumfojnë në debate nuk fitojnë gjithmonë zgjedhjet. Si Trump në 2016, ashtu edhe George W. Bush në 2004 u gjykuan se i humbën debatet, por fituan Shtëpinë e Bardhë.
Edhe nëse ai humbet terren pas debatit, Trump ka pasur prej kohësh avantazhin në dy çështje kryesore: ekonominë dhe emigracionin. Me shumë votues që presin ende përfitimet e rimëkëmbjes ekonomike pas pandemisë, nuk është e sigurt që një debat do të vendosë votën e tyre.
Dhe mesazhet e errëta të Trump për imigracionin dhe krimin mund të jenë mbi krye, por ato janë dëshmuar të fuqishme në të kaluarën.
Dhe ekziston gjithmonë mundësia që ngjarjet tronditëse brenda ose jashtë vendit në dy muajt e ardhshëm mund të prishin ekuilibrin.
/abcnews.al
