Shefi i agjencisë së inteligjencës së brendshme të Gjermanisë (BfV), Thomas Haldenwang, ka deklaruar se PKK-ja është grupi më i madh terrorist i huaj në Gjermani, me rreth 14.500 mbështetës.
“Ekstremistët përdorin krizat për të krijuar lidhje me klasat e mesme dhe gjithashtu ndajnë mitet e konspiracionit, dezinformimit dhe propagandës”, tha Haldenwang gjatë një konference të përbashkët për media në Berlin me ministren e Punëve të Brendshme, Nancy Faeser.
Haldenwang theksoi se ekstremizmi i krahut të djathtë vazhdon të jetë kërcënimi më i madh ekstremist në vend.
“Ne gjithashtu shohim një nivel të lartë të radikalizmit në ekstremizmin e dhunshëm të krahut të majtë”, tha ai.
Sipas tij, gjithashtu është rritur edhe kërcënimi i spiunazhit, ndikimi i paligjshëm, fushatat dezinformuese dhe sulmet kibernetike, kryesisht për shkak të luftës së Rusisë kundër Ukrainës.
“Aktorët kryesor në këto aktivitete të drejtuara kundër Gjermanisë janë Federata Ruse, Republika Popullore e Kinës dhe Republika Islamike e Iranit, secila me një fokus të ndryshëm”, tha Haldenwang.
Faeser, nga ana e saj, mbrojti komentet e shefit të inteligjencës, duke theksuar se “lufta kriminale ruse e agresionit kundër Ukrainës ka ndryshuar situatën e sigurisë në të gjithë Evropën”.
“Ne kemi marrë masa të forta për t’u armatosur kundër spiunazhit, fushatave të dezinformimit dhe sulmeve kibernetike. Raporti i inteligjencës tregon se ekstremistët po bëhen më të dhunshëm dhe më të rinj. Ideologjitë po bëhet gjithnjë e më të përziera”, tha Faeser.
Në fushatën e saj terroriste mbi 35-vjeçare kundër Türkiyes, PKK-ja e listuar si një organizatë terroriste nga Türkiye, SHBA-ja dhe Bashkimi Evropian (BE), ka qenë përgjegjëse për vdekjen e më shumë se 40 mijë personave, përfshirë shumë gra, fëmijë dhe foshnja.
Türkiye është ankuar se pavarësisht statusit të paligjshëm të grupit, vendet e BE-së prej kohësh kanë mbajtur një sy të mbyllur ndaj aktiviteteve të grupit në tokën e tyre, përfshirë për aktivitetet përmes mediave, demonstratave pro-terroriste dhe dhunës që kërcënon zyrat diplomatike turke dhe shtetasit turq jashtë vendit.
