Pedro Sanchez njoftoi të hënën se nuk do të japë dorëheqjen si kryeministër i Spanjës.
“Kam vendosur të vazhdoj, e më shumë forcë nëse është e mundur. Kjo situata nuk është e zakonshme, gjërat do të jenë ndryshe. Unë dhe bashkëshortja ime e dimë që kjo fushatë shpifjeje nuk do të ndalet, ne e vuajmë prej 10 vitesh. Por mund ta përballojmë”, tha ai.
Njoftimi i Sanchez përfundoi një “periudhë reflektimi” pesë-ditore që kryeministri ndërmori pas nisjes së një hetimi për korrupsion ndaj gruas së tij, Begoña Gómez.
Hetimi paraprak u nxit nga një kallëzim penal i bërë nga një grup me lidhje me të djathtën ekstreme. Gjatë fjalimit të tij drejtuar kombit, Sanchez denoncoi peizazhin toksik politik në Spanjë.
“Nëse pranojmë se politika përfshin sulmin ndaj njerëzve të pafajshëm, nuk ia vlen,” shtoi ai.
“Nuk ka asnjë nder që do të justifikojë vuajtjet e njerëzve që doni më shumë.”
Njoftimi i Sanchez i jep fund një fundjavë nervozizmi në Spanjë, e cila ka të ngjarë të kishte hyrë në një epokë pasigurie politike nëse ai do të jepte dorëheqjen. Udhëheqësi socialist nuk ka pasardhës të qartë dhe kreu i Partisë Popullore të opozitës, Alberto Núñez Feijóo nuk ka mbështetjen e nevojshme për të formuar një qeveri alternative, të krahut të djathtë.
Dorëheqja e kryeministrit do ta kishte lënë vendin me një qeveri të përkohshme derisa parlamenti të shpërndahej dhe zgjedhjet e reja të mbaheshin gjatë verës.
