Moska zyrtare i ka cilësuar si të pabaza akuzat e ngritura ndaj disa shtetasve rusë nga Departamenti amerikan i Drejtësisë, për ndërhyrje në zgjedhje. Për qeverinë ruse, akuzat e publikuara të premten nuk përmbanin asnjë provë.
Kremlini i ka cilësuar si të pabaza akuzat e ngritura ndaj 13 shtetasve rusë nga drejtësia amerikane, për ndërhyrje në zgjedhjet presidenciale të vitit 2016. Zëdhënësi i presidentit Putin, Dmitry Peskov, ka deklaruar se akuzat nuk përmbanin “prova thelbësore” për një ndërhyrje ruse dhe ndikimin e shtetit rus në të.
“Ne nuk pamë ndonjë provë thelbësore që dikush të ketë ndërhyrë në punët e brendshme të Shteteve të Bashkuara”, ka thënë Peskov në një intervistë telefonike për CNN. Të premten e kaluar, kryetari i grupit hetimor të skandalit “Russiagate”, Robert Mueller publikoi akuzat ndaj 13 shtetasve rusë dhe 3 kompanive ruse.
Sipas CNN, në to përshkruhej në detaj një përpjekje e paprecedentë dhe disavjeçare e Rusisë për të ndërhyrë në sistemin politik amerikan dhe në zgjedhjet presidenciale. Akuzat bien ndesh me qëndrimin e vazhdueshëm të presidentit Trump, që i vë në dyshim hetimet që nga marrja e detyrës, një vit më parë. Presidenti i ka cilësuar hetimet mbi fushatën e tij presidenciale një rreng, por të dielën që sapo kaloi ai u përpoq të sqaronte qëndrimin e tij.
“Nuk kam thënë kurrë se Rusia nuk ndërhyri në zgjedhje. Kam thënë se mund të ketë ndërhyrë Rusia, Kina, apo çdo vend tjetër. Ose mund të ketë qenë një gjeni që luante me kompjuter nga shtrati i tij”, tha Trump. Nga profili i tij në Tëitter, shefi i Shtëpisë së Bardhë theksoi se, “rrengu” se stafi i tij u mpleks me Rusinë gjatë fushatës nuk funksionoi kurrë./abcnews.al
