Loading ...
Sot përfundon afati 60-ditor që i kërkon Presidentit të SHBA-së, Donald Trump të marrë miratimin e Kongresit për të vazhduar operacionet ushtarake ndaj Iranit ose, në të kundërt, t’i ndalojë ato.
Megjithatë, administrata e tij ka sinjalizuar se nuk do të ndjekë këtë detyrim ligjor.
Sipas Kushtetutës amerikane, vetëm Kongresi ka autoritetin për të shpallur luftë. Ndërkohë, një ligj i vitit 1973 i jep presidentit të drejtën të nisë operacione ushtarake të kufizuara në rast emergjence, por kërkon që brenda 60 ditësh të kërkohet miratimi i Kongresit, të përfundojnë operacionet, ose të kërkohet një shtyrje 30-ditore për arsye sigurie.
Operacionet ndaj Iranit nisën më 28 shkurt, ndërsa Kongresi u njoftua dy ditë më vonë, duke filluar kështu numërimin mbrapsht të afatit ligjor. Megjithatë, administrata Trump pretendon se ky afat nuk është më në fuqi.
Sekretari i Mbrojtjes, Pete Hegseth, deklaroi gjatë një seance dëgjimore në Senat se armëpushimi i arritur më 8 prill ka “pezulluar” afatin 60-ditor. Sipas tij, armiqësitë kanë përfunduar dhe nuk ka pasur përplasje mes forcave amerikane dhe Iranit që prej 7 prillit.
Por ky interpretim është kundërshtuar ashpër nga demokratët. Udhëheqësi i tyre në Senat, Chuck Schumer, theksoi se administrata nuk mund të injorojë ligjin duke pretenduar se afati ndalet automatikisht. “Nuk mund ta ndalësh numërimin mbrapsht kur trupat amerikane janë ende në rrezik,” deklaroi ai.
/abcnews.al/
