Ishte padyshim një fitore e madhe që konfirmon edhe formën e tyre të mirë këtë sezon.
“Demat e Kuq” të Partizanit kanë arritur një tjetër fitore të madhe, teksa kanë arritur të “fundosin” në derbi “Nëndetësen Blu” të Dinamo City, me rezultatin 2-1 në sfidën e vlefshme për javën e 13-të të Abissnet Superiore.
Të gjithë golat erdhën në pjesën e dytë, me golat e Tedi Carës e Arinaldo Rrapajt, që nxorrën “të pavlefshme” golin e Baton Zabergjës, duke ngjitur kështu skuadrën e tyre në vendin e parë të tabelës, me 24 pikë, dy më shumë se ndjekësit më të afërt Vllaznia, ndërsa Dinamo e Ilir Dajës mbetet në vendin e 4-t, me 20 pikë.
Në sfidën tjetër të pasdites, Teuta barazoi 1-1 me Skënderbeun në “Niko Dovana”, ku për djemtë e Edi Martinit shënoi Preknicaj, i cili barazoi shifrat pas rrjetës së ganezit Bismark Charles për “Bardhekuqtë” e Korçës.
Falë këtij rezultati, Teuta ngjitet në vendin e 5-të me 17 pikë, ndërsa Skënderbeu në vendin e 7-të me 12 pikë. /i.m /abcnews.al
