Ditën e sotme El Confidencial zbuloi disa audio-përgjime të Florentino Perez të regjistruara nga gazetari José Antonio Abellán. Presidenti i Real Madrid në vitin 2006, kur janë regjistruar audiot, shprehet se Raul e Casillas nuk janë për Real Madrid dhe akuzon më rëndë sulmuesin.
Pas këtyre përgjimeve ka reaguar përmes një deklarate zyrtare në faqen zyrtare të Real Madrid vetë Perez, i cili shprehet se ato deklarata kanë dalë nga konteksti dhe janë regjistruar në mënyrë të fshehtë nga Abellán. Sipas Perez kjo bëhet për të dëmtuar imazhin e tij.
“Duke pasur parasysh lajmet e transmetuara në El Confidencial, në të cilat grumbullohen frazat që më atribuohen, mendoj se është e nevojshme të sqaroj: Frazat e riprodhuara shqiptohen në biseda të regjistruara në mënyrë të fshehtë nga Z.Jose Antonio Abellán, i cili po përpiqet t’i shesë ato prej shumë vitesh, por pa sukses.
Është e habitshme sesi tani, pavarësisht nga koha që ka kaluar, gazeta El Confidencial vendos t’i publikojë. Ato janë fraza të shkëputura të bisedave, të marra nga konteksti i gjerë në të cilin ndodhin. I riprodhojnë tani, pasi kanë kaluar kaq shumë vite që nga ato biseda.
E kuptoj se kjo ndodh për shkak të pjesëmarrjes sime si një nga promovuesit e Superligës. E kam vënë çështjen në duart e avokatëve të mi, të cilët po studiojnë veprimet e mundshme për të ndërmarrë”, shkruan presidenti i Real Madrid në reagimin zyrtar të tij. /abcnews.al
