Loading ...
Lumir Abdixhiku, i mbijetoi edhe një tjetër sfide politike edhe pse qëndrimin në krye të LDK nga shkarkimi i tij i ndanë vetëm pak vota.
Në Kuvendin e jashtëzakonshëm të partisë të mbajtur pasditen e të enjtes, morën pjesë 328 delegatë nga 355 me të drejtë vote.
Me rezultatin e ngushtë të atyre që donin një kryetar të ri dhe atyre që e votëbesuan përsëri, mesazhi brenda LDK gjithsesi është i qartë: ish partia e Rugovës ka probleme brenda saj.
Një ditë pas rikonfirmimit si kryetar, Abdixhiku, ka shprehur respekt edhe për delegatët që nuk e mbështetën në Kuvendin e Jashtëzakonshëm, duke theksua se demokracia nuk kërkon njëzëshmëri, por respekt për mendimin ndryshe.
“Tani, më ndihmoni të gjithë, të bashkojmë këtë shtëpi; dhe nga këtu të bashkojmë dhe gjithë Kosovën”, ka shkruar Abdixhiku në Facebook.
Sipas Abdixhikut, periudha e fundit ishte një sprovë për partinë, por ajo nuk duhet t’i ndryshojë vlerat mbi të cilat është ndërtuar ky subjekt politik, dikur më i madhi në Kosovë.
Menjëherë pasi i mbijetoi mocionit për shkarkim, Abdixhiku solli në vëmendje bisedimet me Vetëvendosjen, duke thënë se periudha e ngrirjes së bisedimeve ka kaluar, dhe partia do të bashkëpunoj për kapërcimin e krizës institucionale.
Abdixhiku, së bashku me ish-presidenten Vjosa Osmani, u takuan me Albin Kurtin më 10 korrik, për çështjen e krijimit të institucioneve të reja.
Ndonëse takimi nuk prodhoi ndonjë rezultat, Kurti dhe Abdixhiku pas takimit shprehën gatishmëri për vazhdimin e bisedimeve për një marrëveshje.
Abdixhiku e thirri kuvendin e jashtëzakonshëm më 27 korrik, pasi qindra delegatë dorëzuan nismën për shkarkimin e tij, pas pakënaqësive me rezultatin e zgjedhjeve të qershorit, ku LDK-ja doli fuqia e tretë politike me 18 deputetë, në Kuvendin me 120 mandate.
