Më 21 shtator, Vladimir Putin njoftoi një mobilizim të pjesshëm të rezervave ushtarake pasi kundërofensiva e Ukrainës rimarrë me shpejtësi zona të mëdha të territorit.
Ministri rus i mbrojtjes Sergei Shoigu tha se do të thirren rreth 300,000 trupa rezervë, shkruan Sky News.
Pas urdhrit, mijëra rusë u dyndën drejt kufijve të vendeve fqinje duke u përpjekur të iknin, pasi çmimi i biletave jashtë vendit u rrit.
Mobilizimi i pjesshëm është kritikuar nga aleatët perëndimorë, përfshirë ministrinë e mbrojtjes së Mbretërisë së Bashkuar, e cila tha se rezervistët e sapomobilizuar ishin të pajisur keq.
Ministria ruse e Mbrojtjes tha dje se mobilizimi i pjesshëm ishte i plotë dhe se nuk do të nxirreshin njoftime të mëtejshme për thirrje. Megjithatë, raportet këtë mëngjes sugjerojnë se mobilizimi mund të rifillojë, shkruan media britanike.
Një senator i lartë rus tha të martën se Rusia nuk ka nevojë për një dekret presidencial për të zyrtarizuar përfundimin e mobilizimit. Sugjerimi se Putin mund të mos lëshojë një dekret zyrtar mund të rrisë shqetësimin mes rusëve se mobilizimet mund të rifillojnë ende.
I pyetur të hënën nëse do të nxirrte një dekret për të zyrtarizuar përfundimin e tij, presidenti rus tha se nuk kishte marrë parasysh nëse një i tillë ishte i nevojshëm apo jo dhe do të konsultohej me avokatët.
“Nuk kërkohen dekrete shtesë për përfundimin e mobilizimit”, tha Andrei Klishas, cituar nga agjencia e lajmeve TASS. /abcnews.al
