Shpresat e anglezëve për të fituar Euro 2020 janë varur te Harry Kane, lideri, kapiteni dhe goleadori i kombëtares ishullore. 27-vjeçari ka një detyrë të vështirë, pasi do të përballet me “ekspertët” e mbrojtjes italiane.
“Chiellini dhe Bonucci janë mbrojtës të mëdhenj. Ata e lexojnë shumë mirë ndeshjen dhe dinë ku të qëndrojnë. Janë dy luftëtarë, pres të jetë një betejë e fortë kundër tyre, por ky është shkaku pse më pëlqen të luaj futboll“.
Kane vijon edhe të tej, duke komentuar finalen që do të zhvillohet në Londër. “Nuk ekziston vend më perfekt se ‘Wembley’ për të fituar trofeun e dytë në histori. Emocionet dhe adrenalina do të prekin kulmin, por edhe tensioni do të jetë shumë i madh.
Është e veçantë që do të luajmë në stadiumin tonë, tifozët do na karikojnë me kore, energjia do të jetë e pabesueshme. Mjafton të zbresim në fushë dhe të shfryjmë aty të gjithë karikimin tonë.
Kemi mundësinë të shkruajmë një kapitull tjetër të historisë tonë, gjithashtu për prindërit tanë dhe për ata që nuk e kanë parë kurrë Anglinë në finale. Kjo vlen për të gjithë vendin tonë.
Është një moment i veçantë. Nëse fitojmë do të mbahemi mend gjatë gjithë jetës tonë. Kjo është sfida, kështu që duhet ta pranojmë“, deklaroi Harry Kane për kanalin zyrtar të UEFA-s. /abcnews.al
