Fatbardh Kadilli, kandidati që nga rezultatet paraprake mori 763 vota në garën për kreun e PD, ka deklaruar sot nga Selia Blu se 13 qershori nuk ishte një disfatë për të por thjesht fillimi i një projekti të ri.
Kadilli u shpreh optimist për mbështetjen që mori Manifesti i tij politik “në kaq pak kohë” ndërsa shtoi se së shpejti mund të thërrasë një referendum për ta votuar si ligj të PD-së.
“Unë do të vazhdoj komunikimet intensive me demokratët në të gjitha rrugët, kush do të njihet me platformën, është i ftuar t’i bashkohet ekipit të manifestit.”
I pyetur nga gazetarët nëse e uroi kreun e PD për fitoren, Kadilli tha se nuk mund ta urojë fituesin pasi gara ishte e pabarabartë, por shtoi edhe një herë se rezultatin e pranon. Po ashtu, ai e bëri të qartë se në PD ka qenë që nga dita e parë dhe do të vazhdojë të mbetet pavarësisht se kush është në krye të partisë.
“Nuk ka asnjë shans që askush këtu të marrë vendime kundër statutit të partisë. Në sulmet politike nuk ka asgjë personale. Nuk ka njeri që mund të më largojë mua nga PD.”
Por cili do të jetë fati i zgjedhjeve katër vitet e ardhshme me Lulzim Bashën sërish në krye të PD? Kadilli theksoi se Basha ka tani për detyrim që ta çojë partinë drejt fitores, por e bëri të qartë që kjo të ndodhë duhej një projekt i ri, një propozim i ri.
Kurse, duke komentuar deklaratat e liderit historik të PD për mundësinë e rikthimit në krye të partisë, Kadilli tha se nuk sheh që të ketë një iniciativë konkrete nga ana e ish-kryeministrit.
Fatbardh Kadilli ishte i pari që kërkoi dorëheqjen e Lulzim Bashës pas humbjes së zgjedhjeve më 25 prill dhe shpalli kandidaturën për kryetar të PD, dhe për këtë ai tha se “sot të gjithë demokratët mburren se bëmë garë në krahasim me të tjerët. s.b/abcnews.al/
