Në studion e ABC, gazetari Artan Hoxha ka deklaruar se ka një tendencë për të pasur rritje të kultivimit të lëndës narkotike në vend, nisur edhe nga fakti se duke qenë në vit zgjedhor, policia ka qenë e fokusuar te ky proces. Hoxha u shpreh se në Shqipëri ka dy lloj grupesh kriminale, mes të cilëve ata që e kultivojnë dhe e tregtojnë kanabisin në vendet e BE dhe pjesa tjetër që e prodhojnë në Shqipëri.
“Unë gjatë kësaj kohe kam pasur mundësi të lëviz në jug dhe në Shqipëri të mesme. Në vitet zgjedhore ka gjithmonë rritje të kultivimit të kanabisit. Ka momente kur kultivimi kur bima është mbjellë në tokë dhe kur është në inkubator dhe nuk kanë marrë garanci kultivuesit ende që ta mbjellin. Indikatorët krahasuar me vitin e kaluar tregojnë që kemi raste, po i referohem rasteve të kapura. Do të thotë se aty është kultivuar. Njerëzit që e kultivojnë e kanë kthyer në biznes të tyre. Ai që është marrë me kanabis nuk kultivon më domate. Deri tani, nga ato që kam parë unë ka tentativa serioze për ta rritur sasinë e kultivuar.
Vjet nuk kishte fare monitorim nga ajri. Ndërsa këtë vit, deri tani policia ka bërë atë fushatën për të parë ambientet kur mund të mbjellët. Pastaj është momenti kur bima vendoset në tokë. Policia ka rrjetin e vet të informacionit që e vë në dijeni për atë që është duke ndodhur në territor. Dje u kapën edhe bimë në tokë dhe fidanë që nuk ishin vënë akoma në toka. Kur mbillet një parcelë afër ka dhe njerëz të armatosur që e ruajnë. Që të mbillet sasi e madhe duhet të ketë garanci. Ka individë që korruptohen dhe japin garanci për mbjelljen kundrejt pagesës. Kjo ecën për sa kohë nuk bën zhurmë.
Kultivim bëhet nga fermerë të thjeshtë. Ata nuk kanë nevojë për leje, provojnë shansin. Ata që kanë parcelat e mëdha janë nga grupet kriminale. Dy kemi dy lloj grupesh. Grupet shqiptare që e prodhojnë kanabisin në Greqi, Spanjë dhe shesin në Itali. Një nga personat e vrarë ditët e fundit në Elbasan, kultivonte kanabis në Spanjë dhe e tregtonte në Gjermani. Kemi dhe grupet e tjera që prodhojnë në Shqipëri. Këtë vit kemi tregues që mund të ketë më shumë kultivim se vitet e tjera për shkak se policia ka qenë e zënë në periudhën e zgjedhjeve.
Tentativa është për ta kaluar vitin e kaluar. Meqë qeveria e re kërkon disa muaj të betohet, grupet kriminale kanë synuar të kultivojnë bimë tre-mujorëshe. Ata kanë tentuar dhe janë duke mbjellë edhe bimë 6-mujorshe. I kam parë të dyja variantet të kultivuara në tokë. Do duhet monitorim nga ajri dhe shumë punë nga toka. Është e pamundur ta asgjësosh si fenomen se shqiptarët po mbjellin jashtë vendet.
Një faktor tjetër që e favorizon është çmimi i lartë i kanabisit në BE. Çmimi është shumë joshës. Fakti që kufijtë janë të izoluar ka bërë që të rinjtë të mbeten brenda vendit dhe krijon mundësi për fuqi punëtore për krimin e organizuar. Ky target grup shkon zakonisht në ishuj turistik. Kur ata nuk shkojnë dot janë të gatshëm të marrin përsipër punë të tilla. Linjat e trafikut, trafikantët shfrytëzojnë çdo hapësirë që kanë. Jam kapur me transport rrugor, gomone dhe ka tentativa për transport ajror. Nuk janë kapur ende raste”, tha Artan Hoxha. /mv.abcnews.al
