Bullgaria e mbështet integrimin e Maqedonisë së Veriut dhe Shqipërisë drejt Bashkimit Evropian. Kështu është shprehur presidenti i vendit Rumen Radev, në një deklaratë për mediat në Bruksel.
Megjithatë, Radev tha se edhe pse e dëshiron progresin e Shkupit, anëtarësimi duhet të bazohet në respektimin e disa kritereve.
Ai bëri të ditur se liderët e unionit i kanë bërë presion për të hequr veton.
“Prej disa kohësh, unë kam marrë ftesa për bisedime nga udhëheqësit dhe liderët evropianë. Tema është shumë e ndjeshme, kërkesat janë shumë të mëdha. Unë nuk do ta fsheh, ata janë përqendruar në Bullgari, ku kane shumë pritshmëri. Unë nuk do të them “presion”, unë do të përdor këtë frazë diplomatike. Unë e kam bërë pozicionin bullgar shumë të qartë – së pari, Bullgaria është mbështetësi më i fortë i perspektivës evropiane të Maqedonisë së Veriut dhe Shqipërisë. Por rrugëtimi i Shkupit drejt BE kalon kryesisht përmes Sofjes dhe kjo duhet të jetë e qartë.”
Rumen Radev kërkoi që liderët e dy shteteve të ulen në tryze, në Sofje ose në Shkup dhe të specifikojnë problemet që i ndajnë e të gjendet një zgjdhje.
“Mbështetja e të gjitha kryeqyteteve evropiane dhe Komisionit Evropian është e rëndësishme, por më e rëndësishmja është mbështetja e Bullgarisë. Për të ndodhur kjo, ne duhet të ulemi qetësisht në tryezë, ose në Sofje, ose në Shkup, dhe të specifikojmë të gjitha problemet midis nesh dhe te gjejmë mënyrën për t’i zgjidhur ato sa me shpejt. Ne duam të shohim një proces të qëndrueshëm, të pakthyeshëm, jo vetëm deklarata.”
Presidenti bullgar njoftoi se në ditët në vijim do të takojë homologun e tij maqedonas, Stevo Pendarovski, në Itali. /abcnews.al/
