Kompania Apple ka deklaruar se pajisjet e tyre mobile do t’u kërkojnë përdoruesve të zgjedhin nga një gamë sërish kur vendosin asistentin virtual Siri.
Aktualisht Apple lejon përdoruesit të zgjedhin mes një zëri femre dhe mashkulli, si dhe 6 thekse të ndryshme, përfshirë atë amerikan, britanik, indian dhe irlandez, informon abcnews.al.
“Ne jemi të lumtur për të prezantuar dy zëra të rinj Siri për anglishtfolësit dhe opsionin që përdoruesit e Siri të zgjedhin zërin që ata duan”, tha Apple në një deklaratë.
“Ky është një vazhdim i angazhimit të gjatë të Apple për diversitetin dhe përfshirjen në produktet dhe shërbimet që janë krijuar për të pasqyruar më mirë larminë e botës në të cilën jetojmë”.
Ndryshimet e Siri-t janë tashmë të disponueshme në iOS 14.5 beta të Apple dhe do të hyjnë në fuqi për ata që marrin një pajisje të re Apple, kur azhurnimi i softuerit të dalë më gjerësisht këtë vit.
Stereotipat gjinorë midis asistentëve zanorë si Siri, Alexa e Amazon dhe Google Assistant kanë qenë prej kohësh një shqetësim. Në vitin 2019, një raport i Kombeve të Bashkuara paralajmëroi që asistentët e zërit përjetësojnë idenë se “gratë janë ndihmëse të detyrueshme, të bindura dhe të gatshme të përulen, të disponueshme me një shtypje butoni ose me një komandë të zërit”.
Shumica e asistentëve virtualë janë ende të paracaktuar në një zë femre, megjithëse përdoruesit kanë mundësinë ta ndryshojnë tashmë./e.b-abcnews.al
