Fundi i një cikli, Aguero largohet me fjalë zemre pas 10 vitesh nga City

257 gola në 384 ndeshje, emri i tij në histori dhe pas 10 vitesh vjen koha për të shtrënguar duart. Sergio Aguero nuk do të rinovojë me Manchester City dhe tashmë është zyrtare, Klubi anglez e njoftoi fillimisht dhe më pas vetë sulmuesi argjentinas publikoi një letër emocionuese.

“Kur një cikël merr fund, lindin shumë ndjesi. Një ndjenjë e madhe kënaqësie dhe krenarie mbetet tek unë për faktin që kam luajtur për Manchester City për dhjetë sezone, e pazakontë për një lojtar profesionist në këtë ditë dhe moshë.

Dhjetë sezone dhe arritje të mëdha, gjatë të cilave isha në gjendje të bëhesha shënuesi më i mirë në historinë e këtij klubi dhe duke krijuar një lidhje të fortë me të gjithë ata që e duan këtë klub, të cilët do të jenë gjithmonë në zemrën time.

U bashkova me ekipin gjatë epokës së rindërtimit të vitit 2011 dhe fituam një vend ndër klubet më të mëdha të botës. Detyre për të ruajtur këto pozita do të mbetet mbi të tjerat. Sa për veten time, unë do të vazhdoj të jap maksimumin për pjesën tjetër të sezonit për të fituar më shumë tituj dhe për të sjellë më shumë gëzim për tifozët.

Më pas do të nisë një fazë e re, me sfida të reja dhe do të jem i gatshëm t’i përballoj ato me të njëjtin pasion dhe profesionalizëm, siç kam bërë gjithmonë për të luajtur në nivelet më të larta”, shkruan Aguero, në letrën e tij të publikuar në rrjetet sociale në gjuhën angleze dhe spanjolle. /abcnews.al