Gareth Bale u huazua për një sezon te Tottenham, ndërsa në fund të sezonit pritet të rikthehet sërish te Real Madrid, klub me të cilin ka kontratë deri në verën e vitit 2022.
10 gola dhe 3 asiste numëron 31-vjeçari nga Uellsi me ekipin e Jose Mourinhos këtë sezon, teksa agjenti i tij, Jonathan Barnett ka folur rreth së ardhmes së sulmuesit.
“Nuk kemi vendosur afate kohore rreth së ardhmes së Bale, është herët për të folur për të ardhmen e tij. Ai është i fokusuar te Tottenham për momentin“, deklaroi agjenti për BBC Sport Wales.
Vetë lojtari, i cili fitoi 13 trofe gjatë aventurës me Real Madrid, mbi të gjitha katër herë trofeun e Champions League, deklaroi tre ditë më parë se preferon rikthimin në Spanjë.
“Plani fillestar ishte të bëja vetëm një sezon te Tottenham sepse kam edhe një vit kontratë te Real Madrid. Ideja ime është të kthehem atje, kjo është ajo që kisha planifikuar të jem i sinqertë.
Arsyeja kryesore që erdha te Tottenham ishte të luaja rregullisht dhe të shkoja në formë në Kampionatin Europian. Paqartësitë për të ardhmen time nuk do të jenë problem për paraqitjen time në Europian“, deklaroi Bale. /abcnews.al
