Kategoria Superiore ka hyrë në një fazë shumë delikate dhe thuajse gjysma e skuadrave duan titullin kampion. Megjithatë, deri më tani Vllaznia është në rrugën e duhur dhe ka mundur të shkëputet në krahasim me skuadrat e tjera, duke qëndruar e qetë në krye.
Përveç pikëve, Vllaznia është më sipër skuadrave të tjera edhe në përgatitjen fizike dhe bukurinë e të shprehurit të futbollit të saj. Shkodranët janë një ekip, që sulmon nga fillimi deri në fund të ndeshjes, duke treguar edhe formë të mirë fizike.
Këtë e tregon qartë edhe statistika e fundit e zbardhur nga FSHF. Në faqen zyrtare, organi qeverisës i futbollit zbulon se Vllaznia është skuadra me më shumë pikë të siguruara në minutat shtesë (4). Shkodranët kanë mundur të sigurojnë një barazim dhe një fitore në minutat shtesë.
Përveç Vllaznisë, Kastrioti dhe Apolonia janë dy skuadrat me shifër pozitive përsa i përket këtij aspekti (1). Më të ndëshkuarat në minutat shtesë renditen Partizani dhe Bylisi (-2). /abcnews.al
