Kreu i Kadastrës së Beratit Ervin Nelaj është arrestuar me kërkesë të Prokurorisë së Posaçme, pasi akuzohet për korrupsion. Arrestimi i tij ka ardhur pas finalizimit të operacionit “Aluizni”, nga Drejtoria Vendore e Policisë Berat dhe SPAK, pas një hetimi 9-mujor.
Nelaj dyshohet se gjatë ushtrimit të detyrës ka përvetësuar shuma parash nga persona të ndryshëm, me qëllim pajisjen e tyre me dokumentet e lejes së legalizimit.
Në kuadër të hetimeve paraprake të këtij procedimi penal, me kërkesë të Prokurorisë së Posaçme kundër Korrupsionit dhe Krimit të Organizuar Tiranë, të Gjykatës Posaçme e Shkallës së Parë për Korrupsionin dhe Krimin e Organizuar Tiranë, është vendosur masa “arrest me burg”, ndaj kreut të Kadastrës. Shërbimet e policisë në Berat kanë ekzekutuar këtë urdhër-arrest sot.
Nelaj akuzohet për “Korrupsioni aktiv i personave që ushtrojnë funksione publike” dhe “Korrupsioni pasiv i personave që ushtrojnë funksione publike”, të kryer në bashkëpunim.
Njoftimi i plotë:
Finalizohet operacioni policor i koduar “Aluizni”, për goditjen e korrupsionit pasiv të personave që ushtrojnë funksione publike.
Operacioni nga Drejtoria Vendore e Policisë Berat dhe SPAK-u.
Pas një hetimi 9-mujor u finalizua operacioni policor i koduar “Aluizni”, në kuadër të të cilit u ekzekutua masa e sigurisë “Arrest në burg”, për shtetasin E. N., 38 vjeç, banues në Berat, me detyrë drejtor i Agjencisë Shtetërore të Kadastrës në Drejtorinë Rajonale Berat.
Ky shtetas dyshohet se gjatë ushtrimit të detyrës ka përvetësuar shuma parash nga persona të ndryshëm, me qëllim pajisjen e tyre me dokumentet e lejes së legalizimit.
Vijon puna për dokumentimin ligjor të plotë të kësaj veprimtarie kriminale dhe për identifikimin e personave të tjerë të përfshirë në këtë veprimtari korruptive.
g.v/abcnews.al
