“Milani ka bërë një goditje të madhe me afrimin e Mario Mandzukic“, kështu e nis prononcimin e tij për TMW Marco Landucci, i cili punoi si ndihmës trajner i Max Allegrit te Juventusi.
Sulmuesi kroat kaloi 4.5 sezone te bardhezinjtë, aty ku shënoi 44 gola në 162 ndeshje dhe fitoi 9 trofe. 35-vjeçari gjeti akordin me kuqezinjtë e vendit të parë dhe sot do të firmosë me ekipin e ri.
“Mario është një futbollist dhe profesionist i madh. Me ne te Juventusi zhvilloi sezone të jashtëzakonshme, duke dhënë kontributin e tij në sukseset që arritëm në Itali dhe Evropë.
Jam i lumtur që është rikthyer në Serie A, kuqezinjtë e Piolit kanë bërë një përforcim të rëndësishëm, nuk kam asnjë dyshim në lidhje me këtë që po them.
Po flasim për një lojtar të shkëlqyer, jam i bindur që do të jetë i rëndësishëm për Milanin, do vazhdojë të jetë vendimtar në Serie A“, deklaroi Landucci. /abcnews.al
