Real Madrid nuk hasi probleme në ndeshjen e mbrëmjes së kaluar ndaj Celta Vigos. “Los Blancos” fituan 2-0, duke regjistruar suksesin e katërt radhazi shtëpiak në kampionat.
Djemtë e Zidane vijojnë të garojnë fort me Atletico Madrid dhe përkohësisht janë ngjitur në vend të parë të La Liga (Atletico ka luajtur tre ndeshje më pak dhe numëron një pikë më pak).
Trajneri francez i Realit vlerësoi fitoren e ekipit të tij dhe u ndal te gara për titullin kampion në Spanjë. “Ishte shumë e rëndësishme të fitonim për të vënë Atleticon në presion. Jam i kënaqur me të gjithë djemtë.
E kontrolluam ndeshjen gjatë gjithë kohës dhe ishim shumë të ekuilibruar. Më pëlqeu ekipi në rikuperimin e topit, e bënim shpejt një detyrë të tillë. Po përmirësohemi.
Titulli? Nuk besoj se do të jetë një duel midis dy skuadrave të Madridit. Ka shumë skuadra të tjera që mund të përfshihen në garën për titull, janë akoma në lojë. Kampionati është shumë i gjatë“, deklaron Zidane. /abcnews.al
