VAR në Kosovë e Shqipëri, takim mes dy presidentëve të Federatave

schedule17:51 - 29 Dhjetor, 2020

schedule 17:51 - 29 Dhjetor, 2020

VAR është fjala e fundit e teknologjisë në futboll dhe në FSHF po punojnë për ta implementuar sa më shpejt. Presidenti Armand Duka më parë është shprehur se synohet që VAR të vendoset në ndeshjet e Kategorisë Superiore në sezonin e ardhshëm.

Ndërkohë, Kosova pritet ta bëjë këtë më pas dhe duke qenë kështu, FFK ka mundësinë të marrë eksperiencë nga FSHF në këtë risi të madhe për futbollin. Kjo ka nisur që tani, kur FSHF ende nuk e ka konfirmuar përdorimin e VAR, por ka nisur negociatat për aplikimin e sistemit.

Ditën e sotme presidenti i FFK, Agim Ademi dhe sekretari i përgjithshëm, Eroll Saliu kanë vizituar selinë e FSHF dhe kanë marrë sugjerime dhe këshilla nga kreu i FSHF, Armand Duka, i cili është njëkohësisht anëtar i Komitetit Ekzekutiv në UEFA.

POSTIMI – Presidenti Agim Ademi dhe sekretari i përgjithshëm, Eroll Salihu kanë qëndruar sot për vizitë pune në Tiranë, ku janë takuar me presidentin e FSHF-së dhe njëherësh anëtarin e Komitetit Ekzekutiv të UEFA-s, Armand Duka.

Temë e këtij takimi ishte aplikimi i VAR-it në Kosovë, duke pasur parasysh se Shqipëria qysh vitin e kaluar ka filluar negociatat dhe përgatitjet për aplikimin e këtij sistemi. FFK është duke punuar në drejtim të përshpejtimit të këtij procesi, në mënyrë që edhe në Kosovë VAR-i të fillojë të aplikohet në një afat sa më të shpejtë që është e mundur, teksa përvoja e FSHF-së në këtë drejtim mund të ndihmojë shumë.

Në fakt, FFK do ta përdorë të njëjtin sistem si FSHF-ja, që është njëri prej sistemeve më të avancuara, e ku do të shfrytëzohet edhe përvoja dhe softuerët e tyre. Kjo gjë do të mundësojë trajnimin intensiv të gjyqtarëve me sistemin VAR dhe do ta bëjë të mundur përshpejtimin e aplikimit të tij në kampionatin tonë.

Duke pasur parasysh mungesën e infrastrukturës së nevojshme në stadiume, sistemi VAR në Kosovë do të jetë mobil, për çka FFK e ka edhe mbështetjen e UEFA-s. Gjithsesi, një sistem i tillë është jashtëzakonisht i kushtueshëm dhe sipas vlerësimeve të FSHF-së ky sistem kap vlerën e mbi 1 milionë eurove.

FFK është këmbëngulëse që ta realizojë këtë projekt, për çka do të kërkojë edhe fonde nga FIFA por edhe nga institucionet përkatëse të shtetit, duke pasur parasysh se një sistem i tillë tashmë është bërë i domosdoshëm për futbollin. /abcnews.al

Mos rri jashtë: bashkohu me ABC News. Ne jemi kudo!